सियोल, २१ कात्तिक । उत्तर कोरियाले शुक्रबार आफ्नो पूर्वी समुद्री क्षेत्रमा कम्तीमा एउटा ब्यालेस्टिक क्षेप्यास्त्र प्रहार गरेको दक्षिण कोरियाको सेनाले जनाएको छ ।

प्योङयाङले पछिल्ला महिनाहरूमा हतियार परीक्षणको गति तीव्र पार्दै आएको बेला यो नयाँ प्रक्षेपण भएको हो । वासिङ्टन र सियोलसँगको वार्ता लामो समयदेखि अवरुद्ध रहँदा उत्तर कोरियाको यस्तो गतिविधिले क्षेत्रीय तनाव पुनः बढाएको देखिन्छ ।

दक्षिण कोरियाका संयुक्त प्रमुख सेनानी ९ज्वाइन्ट चिफ्स अफ स्टाफ० का अनुसार उक्त क्षेप्यास्त्रको प्रकार, दायरा वा उडान दूरीबारे विस्तृत विवरण हालसम्म सार्वजनिक गरिएको छैन ।

गत महिनादेखि उत्तर कोरियाले आफ्नो हतियार परीक्षणलाई निरन्तरता दिँदै आएको छ । यस अवधिमा प्योङयाङले हाइपरसोनिक र क्रुज मिसाइलहरू फायर गरेको थियो र ती परीक्षणहरूलाई आफ्नो आणविक–सशस्त्र सेनाको क्षमतावृद्धिका रूपमा व्याख्या गरेको थियो ।

यसै हप्ता, दक्षिण कोरियाली सेनाले सोमबार उत्तर कोरियाले आफ्नो पश्चिमी समुद्री क्षेत्रमा करिब १० राउन्ड तोप आक्रमण गरेको पत्ता लगाएको जनाएको थियो । सो दिन अमेरिकी रक्षामन्त्री पिट हेग्सेथले दक्षिण कोरियाको दुई दिने औपचारिक भ्रमण सुरु गर्नुभएको थियो ।

दक्षिण कोरियाको ग्योङ्जु सहरमा यही शनिबार दक्षिण कोरियाली राष्ट्रपति ली जे म्युङ र चिनियाँ राष्ट्रपति सी जिनपिङबीच हुन लागेको शिखर सम्मेलनअघि उत्तर कोरियाले फेरि समान सङ्ख्यामा आर्टिलरी प्रहार गरेको बताइएको छ । उक्त सम्मेलनमा राष्ट्रपति लीले बेइजिङलाई वासिङ्टन र सियोलसँगको वार्तामा उत्तर कोरियालाई पुनः सहभागी गराउन सक्दो पहल गर्न अनुरोध गर्नुभएको थियो ।

मङ्गलबार दक्षिण कोरियाली रक्षा अधिकारीहरूसँग सम्पन्न वार्षिक सुरक्षा वार्तापछि अमेरिकी रक्षामन्त्री हेग्सेथले उत्तर कोरियाको बढ्दो आणविक खतरा र क्षेत्रीय अस्थिरताको सामना गर्न दक्षिण कोरियाले आफ्नो सैन्य खर्च विस्तार गर्ने निर्णयको प्रशंसा गर्नुभएको थियो ।

उत्तर कोरियाली नेता किम जोङ उनले वासिङ्टन र सियोलसँगको कूटनीतिक वार्ता पूर्ण रूपमा तोड्नुभएको छ । अमेरिकी राष्ट्रपति डोनाल्ड ट्रम्पको पहिलो कार्यकाल सन् २०१९ मा प्रतिबन्ध हटाउने विषयमा असहमतिका कारण वार्ता असफल भएपछि किम पुनः वार्तामा फर्किनु भएको छैन । त्यसयता उहाँले आफ्नो आणविक र मिसाइल कार्यक्रमलाई तीव्र बनाउँदै रुससँगको सम्बन्ध सुदृढ पार्नुभएको छ । उहाँले रुसलाई हजारौँ सैनिक र ठूलो मात्रामा सैन्य उपकरण पठाएर राष्ट्रपति भ्लादिमिर पुटिनको युक्रेनविरुद्धको युद्धलाई समर्थन गर्नुभएको छ ।

किमको शस्त्रागारमा अहिले एसिया र प्रशान्त क्षेत्रका साथै अमेरिकी मुख्यभूमि लक्षित गर्न सक्ने विभिन्न दायराका आणविक क्षमतायुक्त मिसाइलहरू समावेश छन् । गत महिनाको प्योङयाङमा आयोजित रुस, चीन र भियतनामका वरिष्ठ अधिकारीहरू सहभागी भएको ठूलो सैन्य परेडमा किमले नयाँ अन्तरमहाद्वीपीय ब्यालेस्टिक मिसाइलसहित शक्तिशाली हतियारहरू प्रदर्शन गर्नुभएको थियो, जुन परीक्षणको तयारीमा रहेको अनुमान गरिएको छ ।

किमले कूटनीति पुनः सुरु गर्न अमेरिकासँगको पूर्वशर्त—आणविक हतियार आत्मसमर्पण—त्याग्न आग्रह गर्नुभएको छ । गत हप्ता दक्षिण कोरियामा सम्पन्न एसिया–प्यासिफिक इकोनोमिक कोअपरेशन ९एपेक० सम्मेलनका क्रममा अमेरिकी राष्ट्रपति ट्रम्पले भेट्ने प्रस्ताव गर्नुभएको भए पनि किमले त्यसलाई अस्वीकार गर्नुभएको थियो ।

यसैबीच, उत्तर कोरियाले बिहीबार अमेरिकी प्रशासनले आफ्ना साइबर अपराधहरूलाई लक्षित गरी थप प्रतिबन्ध घोषणा गरेकोप्रति आपत्ति जनाउँदै वासिङ्टनमाथि ‘दुष्ट शत्रुताको नीति’ अपनाएको आरोप लगाएको छ र अनिर्दिष्ट ‘प्रतिकारात्मक कदम’ लिने चेतावनी दिएको छ । केही विश्लेषकहरूले उत्तर कोरियाको यो वक्तव्यले प्योङयाङ तत्काल वासिङ्टनसँग वार्ता पुनः खोल्न इच्छुक नरहेको सङ्केत गरेको बताएका छन् । एपी